فيــه شاب كان جالس مع ربعه في مكان عام ..وفيه بنت جالسة على طاوله قريبه منهم ..
وطول الوقت وهي عينها في عين الشاب عاد طلع الشاب شاعر ..وعطاها كم بيت
كل شبـر بهالوسعيـه ملـك ربـي تعلميـن
وأعلم إن اللي خلقني هو خلق لك هالعيـون
لكن انتي من جلستي وانتـي فينـي تحدقيـن
كن ما به ناس غيري بهالكراسـي يجلسـون
لو سمحتي عاد أسمعي وحتى لو ما تسمحين
المهم اللـي بقولـه تسمعينـه و يسمعـون
ع الأقل ليا نظرتك سـوي روحـك تستحيـن
غضي طرفك مثل غيرك خوف ربعي يلمحون
الركادة عاد زينة والحياء فـي البنـت زيـن
وفيك جـآزم لا ركـادة ولا حيـاءٍ يذكـرون
تعرفيني ؟! أعرفك ؟! ماأذكـر إنـا ملتقيـن
لا أعرفك من تكوني و لا تعرفي مـن أكـون
وإطمأني إن كان قصدك بس فينـي تشبهيـن
ما هو أنا إلي تعرفيـه والبشـر يتشابهـون
ما دريتي مـن التشابـه يخلـق الله أربعيـن
وأعرف أربع يشبهنـك بـس والله يستحـون
وإن كان قصدك شي ثاني عاد قولي وش تبين
خايف إنا نصير فرجة وإللي ماشتروا يتفرجون
وإذا ببالـك عاجبتنـي لا يحوشـك تحلميـن
صح ربعي من جمالك فيـك صـار يمدحـون
بس وش لي في حلاتك دام فيهـا ترخصيـن
حشمة البنـت وحياهـا والكرامـة يلفتـون
ولو توفر فيك هـذا مـع حلاتـك تبشريـن
ما هو أنا ألف غيري بـاب بيتـك يطرقـون
وش علامك رغم كل اللي أقولـه وتسكتيـن
مو طبيعي هالسكوت وهالبـرود وهالسكـون
إنتي خرسـا أسألـك ولا منتـي تسمعيـن؟؟
قالوا ربعي ذي كفيفـة قلـت لا لا تمزحـون
لين شفتك يـوم رحتـي يمسكونـك باليديـن
ما دريت إلا عيونـي أربـع أربـع يذرفـون
آه ياني منه مشهـد يـوم شفتـك ترحليـن
جيت اشوف عيون ربعي لقيت الكل يدمعـون
قلت سنّـة هالحيـاة وحـن ترانـا مؤمنيـن
الله اللـي مسيّرنّـا بيـن كافـوبيـن نـون
وكل أبونا نختلف مع إننا مـن أصـل طيـن
سبحان يلي مصورنا ولله في خلقـه شـؤون
يعني حنا كل أبونـا عـاد إسمنـا بنادميـن
وليا قضى ربك أمر وقال لـه كـن فيكـون
فينـا يلـي رازقـه خـيـر رب العالمـيـن
وفينا يلي هو لعطفه بحاجة القلـب الحنـون
وفينا يلي ما شكـى مـن علـةٍ كالآخريـن
صـمٌ و بكـمٌ وعمـيٌ فـهـم لا يفقـهـون
بس قليل عـاد فينـا للنعـم هـم شاكريـن
والله يرزق هالخلايق من حيث هم لا يعلمون
وتدري عاد يالكفيفة حنـا تـراى متشابهيـن
وإن ماانعمت أبصارنا قلوبنا هم إللي يعتمون
يالكفيفة يالعفيفة إن قلـت آسـف تقبليـن؟؟
يغفر الله ذنوب عبده ليا خطا وهل تغفرون؟؟؟؟
وسلامتكم ..
منقول
